Taller Madi Piller. ‘Film: Formas y revelaciones’

Venres 31 de maio, de 11h a 14h e de 16h a 20h
E sábado 1 de xuño, de 11h a 14h e de 16h a 20h
Número de prazas: 8
Inscrición: en [email protected]
Prezo: 80€
Horarios: De 11h a 14h e de 16h a 20h.
Lugar: XIZ Montealto (C/ Santa Teresa, Nº10, baixo. 15002, A Coruña)

A peruana afincada en Canadá Madi Piller leva desde hai dúas décadas “cas mans na masa”, traballando de maneira directa e íntima co material fílmico, e explotando todas as súas calidades a través de distintos medios. Coa acción directa sobre a tira de película, deu forma a multitude de traballos (desde películas a performances): unha práctica que difundirá a través deste taller no que se convida a xerar unha peza colectiva a modo de filme performance.

Neste taller, botaremos man de materiais fílmicos usados (en 35mm e 16mm), atopados ou caducados, que serán manipulados con materiais químicos e orgánicos, pintando, cortando, ou rasgando: todo vale cando se trata de facer cinema sen cámara. O taller tamén inclúe un apartado especial dedicado ao son, no que se aproveitará o son óptico dos proxectores de 16mm: toda imaxe contén un son, que tamén será manipulado de formas diversas.

Coas obras resultantes en 16mm, e coas dixitalizacións do 35mm manipulado, construirase unha performance colectiva que será presentada publicamente o domingo 2 de xuño ás 19 horas na Sala (S8) PALEXCO.

O taller está dirixido a todas aquelas persoas interesadas na creación artística e fílmica e/ou que desexen incorporar o traballo con celuloide atopado á súa práctica. Non é necesario contar con coñecementos previos nesta área.

Phil Hoffman. Vivir/filmar

Imaxe: Phil Hoffman. Intro

Vendo o cine de Phil Hoffman, parecera que vivir e filmar son a mesma cousa. Hoffman conseguiu dende o principio da súa carreira (que comeza nos setenta) dominar a arte do diario filmado, facendo que a sinceridade e a emoción se conxuguen á perfección coa forma. Nacido en 1955 en Kitchener, Ontario, Hoffman ocupa un lugar preeminente na rica escena do cinema experimental canadense, non só como cineasta senón tamén como impulsor dun proxecto educativo que ten marcado a vida e as formas de facer de moitos outros cineastas desde que comezara en 1994: a Film Farm. Unha sorte de “retiro espiritual” colectivo ou “campamento de verán” para cineastas no que se levan a cabo proxectos persoais e experimentais en formato fílmico e con técnicas de revelado artesanais e ecolóxicas. info

Aberta convocatoria do obradoiro de Philip Hoffman: Film Farm on the Road

Imaxe: S8

Cada ano no verán, entre o verdor e os ríos de Mount Forest (Ontario, Canadá), ten lugar desde 1994 un retiro único para cineastas, creado e impulsado por Philip Hoffman. Na Film Farm, sorte de campamento de verán do cinema artesanal, durante unha semana de convivencia fílmase, revélase e compártese coñecemento, nun contexto aberto onde prima a autosuficiencia, de costas ás leis do mainstream e apoiando aos creadores nas marxes. Nesta edición do (S8) a Film Farm viaxa á Coruña da man de Hoffman, que impartirá un taller de catro días baixo a filosofía do que el chama o Process Cinema. Co 16mm como formato guía, e revelando con materiais ecolóxicos como flores silvestres e auga de mar, uns días únicos da man dunha das figuras esenciais do cinema artesanal e diarístico de Canadá.

Lugar: La Nautilus (Praza de Azcárraga 7, baixo. A Coruña)
Datas: do 5 ao 8 de xuño
Horarios: de 11 a 14 e de 15 a 20 horas.
Número de prazas: 8
Prezo: 150 (con todo o material incluído)
Requisitos: o obradoiro desenvolverase en inglés. Pídeselles aos participantes que traian, se dispoñen deles, os seus computadores portátiles con software de edición
Inscricións: ata o luns 4 de xuño en [email protected]

CALENDARIO

Martes 5 de xuño
11 a 14 horas
Introdución ao Process Cinema: colleitar, reflexionar, revisar
(O Process Cinema é segundo Hoffman “unha forma de facer que “explora a tradición creativa do cinema alternativo, improvisacional e interactiva. A través dunha metodoloxía guiada polo proceso, o guión como documento guía é substituído por unha integración fluída da escritura, a rodaxe e a montaxe, non necesariamente nesa orde. Esta maneira de traballar “a través” do proceso ten o seu parangón na música, o jazz, na arte sería o action painting, os aspectos performativos do caderno de bosquexos ou na “prosa espontánea da poesía beat”.)

Proxeccións e debate

15 a 20 horas
Introdución ao manexo da cámara Bolex de 16mm Iluminación e exposición
Técnicas de revelado artesanal (revelado convencional e ecolóxico)
Filmación de probas coa Bolex
Taller de revelado
Transfer das probas en 16mm a dixital

Mércores 6 de xuño
11 a 14 horas
Proxección das probas do día anterior
O celuoide como lenzo: tinguido e virado, pintura sobre metraxe atopada
Manipulación da imaxe
Proxeccións e debate sobre as películas

15 a 20 horas
Distribución do equipo
Proxectos de rodaxe
Revelado de película
Tinguido, virado e pintura de película
Transfer de película a dixital

Xoves 7 de xuño
11 a 14 horas
Proxección das películas en proceso dos participantes

15 a 20 horas
Rodaxe de proxectos
Revelado de película
Tinguido, virado e pintura de película
Transfer de película a dixital
Edición de proxectos

Venres 8 de xuño
11 a 14 horas
Reunión para planear a presentación
Proxección das obras en proceso

15 a 20 horas
Virado e tinguido, pintura e manipulación de película
Transfer de película a dixital
Edición final de proxectos

PROXECCIÓN FINAL

*O calendario non inclúe todas as actividades e contido do taller

Obradoiro Mini (S8): A imaxe expandida. Laboratorio de cine e experimentación audiovisual

Destinado ao público infantil de 7 a 12 anos. Dúas mañás de experimentación e creación audiovisual percorrendo de maneira práctica e divertida elementos clave da linguaxe do audiovisual. Utilizando aparellos de proxección analóxicos e dixitais, con axuda de lentes, lupas e lanternas, descubriremos a maxia e o poder fascinador do cinema. Da man da cineasta Xisela Franco e o artista audiovisual Juanma LoDo inventaremos xogos de sombras, crearemos os nosos propios contidos audiovisuais: fotogramas con recortes que animaremos, xogando coa luz e con todo tipo de obxectos animados e inanimados. Todo iso será rexistrado con dispositivos de gravación de vídeo dixital, e volverémolo proxectar para avanzar no propio proceso de creación de novas linguaxes e narrativas audiovisuais.

Así no transcurso desta veloz e alucinatoria viaxe coñeceremos algúns xoguetes do pre-cinema,
descubriremos que é a cronofotografía cos experimentos de Muybrige e Marey, ou petiscaremos no cinema primitivo (Alice Guy, irmáns Lumiére, Méliès). O paso seguinte será descubrir a maxia da montaxe (Kulechov, Hitchcock), experimentar a asociación de imaxes que crea sentidos. E por último queremos alumar as posibilidades que deu a chegada do sonoro. Para facer máis interactivo este traxecto en busca dos segredos da fascinación do cinema, valerémonos da tecnoloxía cibernética e dixital, e alternaremos distintos softwares de maneira que o computador se converterá en catalizador final das nosas propias imaxes, sons e sensacións.

LUGAR: Fundación Luis Seoane, Rúa San Francisco, 27, A Coruña.
HORARIO: Sábado 27 de maio de 11h a 14h / Domingo 28 de maio 12h a 14h
INSCRICIÓNS: Na dirección de correo electrónico, [email protected] indicando no asunto do mail: Obradoiro mini(S8). Prazas limitadas.
PREZO: €10

Cinema mudo para nenos e nenas: Lotte Reiniger

Este domingo ás 12:00 h no Antigo Cárcere o (S8) dá espazo a unha sesión moi especial. Trátase dun obradoiro, impartido por Maria José Rueda, no que todos os nenos que se acheguen pola Mostra poderán descubrir a través de diversas actividades lúdicas e didácticas, o mundo da pioneira da animación Lotte Reiniger. Ao taller seguiralle unha sesión familiar coas películas de Reiniger que de seguro conseguirá enfeitizar tanto a nenos como a maiores. As súas animacións, feitas de xeito artesanal con siluetas recortadas que Reiniger fabricaba con mestría, lévannos por exóticas historias cheas de aventuras e de misterio, protagonizadas por criaturas fabulosas, príncipes, alfombras máxicas e paisaxes imposibles. info